البدائية هي الحل

التكنولوجيا لا تأتي بخير ولا تساعد علي تقدم البشرية. الثورة الصناعية كانت وبال علي الجنس البشري, لانها قضت علي انماط الحياة البسيطة اللي الانسان عاشها منذ فجر الوجود الانساني علي الارض, وحولته الي ترس في ألة. الانترنت لا تساعد علي انتشار المعرفة. اللي غاوي يقرا ويطلع كان زمان بيدور بابرة علي الكتب والمجلات من كل المصادر المتاحة من غير نت ولا يحزنون, كل اللي النت عملته انها سهلت عليه الحصول علي مصادر القراءة والاطلاع, وان كان علي حساب التركيز والاستيعاب, لان وعينا بقي مشتت, وبقينا ماعندناش صبر نقرا كتاب طويل او نكمل مقالة لغاية اخرها من ساعة الانترنت اللعينة مادخلت الحلبة, وكله بقي عايز ساوند بايتس. أما بقي اللي مابيقراش اساسا, وكل همه تصغح مجلات السكس او الكلام في التليفون (ودول غالبية البشر علي أي حال), فتحول لأفلام البورنو والشات اونلاين عند ظهور النت.  يعني كل اللي التكنولوجيا عملته انها سهلت لكل واحد ميوله الاصلية ان خير فخير,و ان شرا فشر.  ولكن في الغالب اللي عملته ده كان شر في حد ذاته,  لانه خلا كل واحد ياخد اللي هوه عايزه من غير مجهود, فبيفرط فيه بسهولة بعد كده. فيه دراسات كتيرة اتعملت توصلت ان تأثير المعلومة المستقاة من كتاب مطبوع اكبر وأبعد مدي من القرف اللي بنلمه شمال ويمين من عالنت.

 انت لما تكون نفسك هفاك علي حاجة حلوة انهي اصح وافضل؟  تاكل تفاحة والل اتاكل حتة هريسة؟ التفاحة حلاوة رباني مخلوطة بالياف وفيتامينات وميه واملاح. يعني غذاء شبه متكامل ومافيهوش سعرات كتير, انما الهريسة سكر متدوب في سمنة متدوب في دقيق, يعني سم في سم في سم .كل منها كل يوم وانتا بنكرياسك حيتحرق  ودهونك الثلاثية حتبقي في السما. التفاحة مثال للحياة البسيطة اللي معظم البشرية عاشت فيها من اول وجود الانسان علي الارض لغاية 150 سنة فاتت تقريبا. كانت فيه حروب لكن ماكانش فيه دمار شامل, كان فيه ظلم لكن ماكانش فيه ابادة جماعية, كان الانسان شقيان لكن ماكانش عنده اكتئاب. حتي الامراض الفتاكة اللي كانت بتحصد حياة الناس قبل اكتشاف المضادات الحيوية ماكانتش اكتر فتكا من امراض التخمة الحالية. المشي اصح من الركوب. ركوب الجحش احسن من ركوب الكاديلاك بئست الدعة والراحة المصاحبة للحياة العصرية واللي بتودي صاحبها في داهية لانها بتغير من طريقة ونمط حياته اللي جسمه مصمم عشان يعيش بيها, واللي عاش بيها فعلا منذ بدء الوحود الانساني الي وقت قريب.

 عالم الرياضيات في جوراسيك بارك لما حذر المليونير صاحب المشروع بتاع اعادة الديناصورات للحياة بشرط انها تبقي محبوسة جوه جنينة حيوانات من العواقب المحتملة بانه قاله "الحياة حتلاقي طريق خارج القفص مهما حاولت تحبسها فيه" كان بيفكر صح, لان اي عبث بالطبيعة بيؤدي بالضرورة لنتائج كارثية. مد في عمر الانسان بانك تعالج الامراض الوبائية زي الكوليرا والطاعون, تطلعلك سلالات بكتيريا مبتحوقش فيها الانتيبيوتيكس. اقضي علي الجدري يطلعلك الايدز.زود في متوسط حياة الناس بانك تبعدهم عن مخاطر الحياة قريبا من الطبيعة ورصصهم في المدن زي السردين, تجيلهم امراض الجهاز الدوري والسكر  والايض في منتصف العمر, والسرطانات والزهايمر للي حيوصل لمرحلة الشيخوخة منهم. اقضي علي الغابات المطيرة في الامازون او الباردة في الاسكا عشان تنقب علي البترول, يحط عليك النينيو والاعاصير والتسونامي وثقب الاوزون والاحتباس الحراري من كل ناحية. ابني انظمة انتاج غذائي وزراعي مميكنة عشان تساعد البشر علي الزيادة السكانية بشكل مرضي, تقوم الحروب اللي تحش ارواح الملايين الزيادة اللي ماكانش المفروض ييجوا اصلا.

 مش كل نظرية علمية الانسان اكتشفها لازم نحولها لتطبيق تكنولوجي. العلماء عندهم حب للاكتشاف والاختراع لاشباع عقولهم الفضولية الذكية. ودي حاجة لاتختلف في جوهرها عن رغبة المهووس بالجنس بانه يعمل علاقات مع اكبر عدد من الستات, او النهم بانه ياكل اكبر كمية من الاكل. وزي مالمجتمع بيحط قيود علي الرغبات في الحالتين التانية والتالتة. لان اطلاقهم بلا قيود ممكن يضر المجتمع (والشخص ذاته), كمان لازم يحط قيود في الحالة الاولي, لانه طول مالعلم وتطبيقاته حبيس في ايدين الرأسماليين اللي مايهمهمش غير المكسب, يبقي ضمنا ان كل اكتشاف لقانون علمي, حيصحبه تطبيق تجاري هدفه الاساسي زيادة ربح المستثمر الرأسمالي, دون أدني اكتراث بالعواقب الوخيمة المحتملة لهذا التطبيق علي المجتمع واولها واهمها ظهور الماتريكس الرأسمالي الحالي اللي مسخ الحياة البشرية علي كوكب الارض الي الحالة التحت انسانية المشاهجة حاليا علي الكوكب. أما اذا وقعت القوانين العلمية في ايدين السياسيين,  فقول علي البشرية يارحمن يارحيم. خلينا ماننساش ان قوانين الطاقة والكتلة بتاعة اينشتين لما وقعت في ايدين الساسة صبحنا الصبح لقينا عندنا هيروشيما وناجازاكي, وانه من ساعة ما نوبل اكتشف الديناميت والعالم مابطلش فرقعة.