ليه الحمام لازم يربي ضوافره ويشحذ مناقيره؟

 في أي مجموعة من الطيور ممكن نلاقي سلوكين متميزين: سلوك الصقور وسلوك الحمائم. سلوك الصقور يميل للعدوانية وفرض الرأي علي الآخرين بالقوة, بينما سلوك الحمائم يعتمد علي المسالمة وإتباع مبدأ يا بخت من بات مظلوم ولاباتش ظالم. ومين فينا ماسمعش تتر مسلسل الحرافيش بصوت سيد مكاوي وهو بيقول الخلق صنفين وتالتهم ياحسرة مفيش, صنف ابن شياطين فتوة يعيش بتهبيش, وصنف غلبان ياعيني وماشي جنب الحيط, وهما دول اللي بنسميهم الحرافيش. وزي ما الحرافيش فضلوا مقهورين وطالع عينهم طول ما فضلوا منتظرين عاشور الناجي, او فتوة طيب زيه بييجي يخلصهم من الظلم ويجيبلهم حقهم, لغاية ماادركوا ان الحل في ايديهم هما, وانهم لازم مايستنوش بطل او مسيح او مهدي منتظر متخيل مش حييجي أبدا, فقاموا وواجهوا أبناء الشياطين وقضوا عليهم.  كمان الحمائم لازم تطور سلوك صقور ان ما كانش عشان حاجة عشان علم التطور بيقولنا ان ده لما بيحصل, الصقور بتخاف ان دمها يسيح, وبتجري علي مائدة المفاوضات عشان توصل لحل وسط.

نداء الي المتظاهرين والثوار والنشطاء, اذا كنتم متمسكين بالخيار السلمي ومش عايزين تعملوا تطوير نوعي في اساليب ضغطكم فمش اقل من انكم تكونوا مجموعات حماية مسلحة تسليح دفاعي, تخرج في كل اعتصام او مظاهرة, عشان تواجه البلطجية او الامن او الشرطة العسكرية, لو تحرشوا بالمعتصمين او حاولوا يفضوا التظاهر بالقوة. لو الناس دي أصيبت بعاهات أو دمها ساح أو مات منها إفراد في أي صدام, مش حتشوفوا وشهم تاني. الناس دي ليسوا علي شيئ وملهمش قضية يدافعوا عنها, عشان كده حياخدوا ديلهم في سنانهم ويجروا لو ارتفعت فيهم الخساير. حرام الشباب اللي زي الورد ده يموت فطيس وتحصله عاهات, والمفتريين سلام لايصيبهم مكروه. خلوا تمن الجرايم بتاعتهم غالي, وهما حيفكروا الف مرة قبل مايكرروها. امنوا الاعتصامات والمظاهرات بمجموعات حماية مدربة, ومافيش مظاهرة ولا اعتصام تطلع من غيرها. وماحدش قالكم ابتدوا بالعدوان, من اعتدي عليكم فاعتدوا عليه بمثل من اعتدي عليكم إن الله لايحب المعتدين.