صوت الشيطان أم صوت الضمير

لا يوجد عندي أدني شك في ان تطورات الأحداث حتقنعك بالشكوك اللي سبق وطرحتها زي ما طرحها غيري في المجلس العسكري (راجعي مساهماتي السابقة) المشكلة هي متي تقتنعين فالمسألة مسألة وقت واللي خد أي اختبار ذكاء يعرف كويس ان الفرق بين الشخص الذكي و الشخص العادي مش في ان الاولاني بيحل الاسئلة اللي التاني بيفشل في حلها لانك لو اديتي للاتنين كل الوقت اللي عايزينه حيوصلوا لنفس النتيجة الصح الفرق هو ان الامتحان له وقت محدد علشان يفرق بين الذكي اللي حيفهمها وهي طايرة في اقل وقت والغبي اللي حينتهي الدرس (قصدي الامتحان) قبل ما يوصل للحل السليم

وده كله مهم جدا في السياق الحالي لان الحالة الثورية (بالنسبة لجموع الشعب اللي النخبة طلع روحها علي ما قدرت تخليها تخرج) بتبرد بنفس سرعة تجمد الشمع السائل اذا تركتيه في درجة حرارة الغرفة فمثلا في اوائل ايام الثورة كانت الجموع مش محتاجة اصلا حد يقولها عشان تطلع كل يوم بالملايين لكن في أخر مظاهرة اللي كان المفروض تكون مليونية الاعداد ماوصلتش كام ميت ألف (مع اننا طالبنا اننا نعود الناس علي التجمع المليوني ولو كل يوم جمعة تحت بند الوحدة الوطنية مثلا بس ماحدش سأل فينا) دلوقتي حتبقي محظوظة لو لميتي ميت ألف انما بعد شهر من دلوقتي علي مايكون ربنا فتحلك مخك حيكون كل سنة وانتي طيبة

الماساة الي احنا فيها هي اني مش مهم اكون انا او اي حد من الالاف اللي عندهم شكوك زيي مقتنعين بتآمرالمجلس العسكري احنا اشخاص قدرتنا علي التاثير منعدمة لكن انتي بالقبول اللي عندك أولا والظروف اللي دفعتك الي المقدمة ثانيا مسموعة وشئتي ام ابيتي نجحتي فعلا في تحريك الناس عشان كده سرعة فهمك –وفهم الاشخاص المؤثرين مثلك- لتفسير تصرفات المجلس العسكري هي مسالة حياة او موت بالنسبة للثورة

انتي كتبتي من يومين تلاتة انك مايهمكيش الموت بل باالعكس تتمني تموتي شهيدة مش عارف ليه لما قريت الكلام ده افتكرت فيلم جه في نادي السينما من كام سنة عن جان دارك (ذا ميسينجر) و داستين هوفمان لعب فيه دور الضمير (أو الشيطان) حسب فهم كل واحد للفيلم اللي كان بيطلعلها في السجن وهي مستنية حكم الاعدام عشان يخليها تعيد التفكير في كل اللي عملته بغرض التوبة واحلاص النية لوجه كريم قبل لقاؤه (اذا اقتنعتي انه الضمير) او تكفيرها وزرع الشك في قلبها (اذا اقتنعتي انه هو الشيطان) أرجوا انك ماتمريش بتجربة مماثلة لانك واضح من كلامك مؤخرا عن الشعب اللي حيقطعنا لو ثبت ان شكوكنا مش في محلها انك بتبصي لنا علي اننا صوت الشيطان مش صوت الضمير